Cal u-cumro d-Mor Gabriel

Cumro d-Mor Gabriel

Bi shato dan 397 bëthër më-Mshiho tre qadishe macmare cito. I citatheh ad-yawma këdcinalah bu ëshmo d-"Mor Gabriel" aw "Dayro d-Qartmin". Më zabno l-zabno athi came nëxroye ghalabe lu athraydan; a-caraboye, a-kurdoye, a-fërsoye, a-monguloye, a-turkoye w-hesh ste.

Hul ad-yawma qtol camo lë qtile u-camaydan. Hul ad-yawma mahyo qashyo lë madrele i-marduthaydan. Hul ad-yawma umthonoyutho caraboyto aw kurdoyto aw turkoyto lë qtila i-umthaydan. Bas hul ad-yawma a-came nëxroye këbci maydi u-athraydan. Këbci u-camaydan d-mahzëm mu athro u kë-mazici u-camo suryoyo b-mamlo u-b-cwodo batilo. U-darbo du qrobo lë manfacle. U-darbo du qtol camo lë manfacle. U-darbano, awkith bu mede dë-k-saymi ad-yawma a-turkoye w-a-kurdoye këmi u-cumro macëmro-yo bu athratheh, bi-arcatheh wa-suryoye klozëm madcëri i-arco u-nëfqi më-tamo, ara u-darbano gëd-manfëc? Gëd-howaleh i-arco d-këtyo di dayro d-Mor Gabriel? Lo, lo, ba-haye lo.

Meqëm d-këtwo ëshmone xëd "turkoyo", "kurdoyo" aw "mashëlmonutho/tayutho", këtwo suryoyutho! Këtwo mardutho d-suryoye! I cito, d-hawyo dayro, d-Mor Gabriel këtwo!

Ëno ste cayësh-no bi dayratheh 5-6 yarhe u-k-hoze-no i dayro xëd tufso, xëd tedmurto mi-shmayo, lu-camaydan. Ad-yawma ste ghalabe kë-më-ftakar-no ba-comure di dayro; kito dayroye, dayroyothe, yolufe, iqaryothe u-cawode tamo u u-baytatheh i dayro-yo.
Loxu k-omar-no; "Hatu lo k-koletu ruhayxu, u-camano u-suryoyo gëd-tëcnilxu ba-hasathe idha k-lozëm. Amino-ith b-lebi gëd-howetu, ya Noture d-leshono"